३१ मार्च १९३१, इस्टर सनडे – रविवारचा दिवस, अमेरिकतील न्यूयोर्क
शहरातील फिफ्थ अवेन्यू, उचाभ्रू वस्तीचे ठिकाण, अमेरिकन स्त्री पुरुष
रस्त्यावरून रमत गमत सुट्टीचा आस्वाद घेत आहेत. अशातच उच्चभ्रू, सुंदर दिसणाऱ्या
काही स्त्रिया, बर्था हंट ही त्यामधील एक, सिगारेट पेटवतात व भर रस्त्यात
धूम्रपानाचा आस्वाद घेतात. ही घटना खरतर अमेरिकन लोकांसाठी नवीनच कारण सार्वजनिक
ठिकाणी स्त्रियांनी धुम्रपान करणे हे अतिशय असभ्यपणाचे लक्षण मानले जायचे. एकूणच
स्त्रियांनी धुम्रपान करू नये ही समाज मान्यता. पण पुरुष मात्र सर्रास सार्वजनिक
ठिकाणी धुम्रपान करत असत ते ही ऐटीत. थोड्याच वेळात ही बातमी कव्हर करायला
वार्ताहर तिथे पोहचले, त्यांनी या स्त्रियांच्या मुलाखती घेतल्या. तुम्हाला
अशा पद्धतीच अभियान का करावा वाटल? या प्रश्नाला हंटने उत्तर दिल
“रस्त्यावर मी सिगारेट ओढत असताना एका माणसाने मला ती विझवायला भाग पाडलं कारण एक
स्त्री रस्त्यावर धुम्रपान करते आहे हे त्याला सहन झाल नाही, मी ही गोष्ट जेव्हा
माझ्या मैत्रिणींना सांगितली तेव्हा आम्ही सर्वांनीच या वर काहीतरी उपाय केला
पाहिजे असा विचार केला”. सार्वजनिक ठिकाणी धुम्रपान करणे ही काही फक्त पुरुषांची
मक्तेदारी नाही, स्त्रिया आता पुरुषांच्या मानाने कुठेही मागे नाहीत, स्त्रिया आता
स्वतंत्र आहेत, आम्ही पुरुषांची ही मक्तेदारी मोडून काढणार आहोत, सिगारेट ही आमची “torch of freedom” आहे अशा स्वरूपाचे
निवेदन या स्त्रियांनी वार्ताहरांना दिले. दुसऱ्या दिवशी जवळपास प्रत्येक अमेरिकन
वृतपात्राने या घटनेची दाखल घेतली होती, धुम्रपान करणाऱ्या स्त्रियांचे फोटो व
मुलाखती छापून आल्या अन् त्यांना बरीच प्रसिद्धी मिळाली. या घटनेनंतर सार्वजनिक
ठिकाणी धुम्रपान करणाऱ्या स्त्रियांचं प्रमाण लक्षणीयरित्या वाढलं.
वर वर पाहत ही घटना खूप उत्स्फूर्त वाटते,
प्रत्येक क्षेत्रातील पुरुषांच्या मक्तेदारीला त्रासलेल्या स्त्रियांचं हे बंड आहे
असं वाटत. पण ही घटना उत्स्फूर्त तर नाहीच नाही पण ती सहज घडलेली ही नाही, ती
अतिशय सुनियोजित होती अन् काही ध्येय साध्य करण्यासाठी घडवून आणली गेली होती, या
घटने मागचा मास्टर माईंड होता ‘एडी बार्नेस’.
बार्नेस हा
पब्लिक रिलेशनचा पितामह समाजला जातो, बार्नेसची दुसरी ओळख म्हणजे तो प्रसिद्ध
मानसशास्त्रज्ञ सिग्मंड फ्राईडचा पुतण्या. बार्नेस हा मानसशास्त्राचा त्यातले
त्यात मनोविश्लेषणशास्त्राचा चांगलाच
अभ्यासक होता. तो मोठमोठ्या कंपन्यांचा
सल्लागार होता, आपल्या मालाचा खप कसा वाढवावा या विषयी तो कंपन्यांना सल्ले देत
असे. अमेरिकन टोबको कंपनीचाही तो सल्लागार होता. या काळात अमेरिकन टोबको कंपनीचा
विक्री दर एका saturation level ला
पोहचला होता, विविध प्रकारे प्रयत्न करूनही त्यात वाढ होत नव्हती, पुरुष जरी
मोठ्या प्रमाणात धुम्रपान करत असले तरी स्त्रियांचे धूम्रपानाचे प्रमाण अगदीच
नगण्य म्हणजे ५% होते. कारण फक्त वेश्या वा वाईट चालीच्या स्त्रिया धूम्रपान करतात
असा समाज होता. कुलीन स्त्रिया धुम्रपान करत नसत अन् तस करणे हे समाजमान्य नव्हते.
“ पण जर स्त्रियांमध्ये धूम्रपानाच प्रमाण वाढल तर आपल्या उत्पादनांच्या विक्रीमध्ये
मोठीच वाढ होईल “ असा अमेरिकन टोबको कंपनीचा प्रमुख जॉर्ज हिलचा अंदाज होता. “ महिलांमध्ये
धूम्रपानाचे वाढलेले प्रमाण ही तर आमच्यासाठी अंगणातील सोन्याची खाण ठरेल ” असं तो
म्हणत असे. अशाप्रकारे स्त्रियांना धुम्रपानाकडे आकृष्ट करण्याच आव्हान बार्नेसने
स्वीकारलं. धुम्रपानामुळे अतिरिक्त चरबी वाढत नाही व त्यामुळे स्त्रिया सुडौल राहू
शकतात असा प्रचार व जाहिराती करायला बर्नेसने सुरवात केली. पण त्याचा म्हणावा
तितका फायदा झाला नाही, तेव्हा बार्नेसने मनोविश्लेषक व फ्राईडचा शिष्य ए ए ब्रिल
याचा सल्ला घेतला. ब्रिलच्या मते सिगारेट हे पुरुषी अहंकाराच, मर्दपणाच, पुरुषी
वर्चस्वाच प्रतीक होय. धुम्रपानामुळे पुरुषांमधील ही वृत्ती सुखावली जाते. म्हणजेच
तुमच्या सुप्त मनातील वासना वा भावना ही एखाद्या वस्तूच्या वापराशी वा उपभोगाशी
जोडली तर ती वस्तू वापरण्याकडे वा उपभोगण्याकडे माणसाचा कल वाढतो, जणूकाही त्या वस्तूच्या वापरातून तो आपली सुप्त मनातील
वासना वा भावना पूर्ण करत असतो, या मुळेच पुरुषांमधील धूम्रपानाच प्रमाण लक्षणीय
आहे.
बर्नेसने स्त्रियांनी धुम्रपान करणे हे
पुरुषी अहंकारला, वर्चस्वाला आव्हान होय, ही एक स्त्री स्वातंत्र्याची अभिव्यक्ती
होय अशा प्रकारचे जनमानस ( की स्त्री मानस?) तयार व्हावे या साठी प्रयत्न करायचे
ठरवले. स्त्रियांच्या धुम्रपानाला हा नवा अर्थ प्राप्त करून देण्यासाठी त्याने
वरील घटना घडवून आणली, बर्था हंट जी की या
torches of freedom या
अभियानाची प्रमुख होती, ती बर्नेसची सेक्रेटरी होती, अन् बाकीच्या तिच्या मैत्रीने
या भाडोत्री मॉडेल्स होत्या. ही घटना प्रसिद्धी माध्यमांना लगेच कळेल अशी
व्यवस्थाही केली गेली होती. या धुम्रपान करणाऱ्या स्त्रियांनी काय मुलाखती
द्यायच्या हे ही आधीच ठरले होते. याचा परिणाम म्हणजे ५% वर असणारे स्त्रियांचे धूम्रपानाचे
प्रमाण १९२९ पर्यंत १२% वर गेले, तर १९३५ पर्यंत ते १८% वर गेले, १९६५ मध्ये एकूण
सिगारेट उत्पादनापैकी ३३% सिगारेटी महिला ओढत असत. अन् हे वेगळ सांगायला नकोच की बार्नेसला हे
करण्यासाठी भरमसाठ रक्कम मिळाली.
माणसाच्या भाव भावनांचा उपयोग एखाद्या वस्तू
वा सेवेच्या जाहिरातीसाठी करणे हे काही आपल्याला नवीन नाही, खर तर आजच्या बाजारपेठेचे
हे तत्वच आहे, पण स्वतंत्र हे मूल्य धुम्रपान या कृतीशी जोडण मला फारच अनैतिक
वाटत. आपल्यावर होणाऱ्या अन्यायाचा विरोध आपण कोणत्या कृतीतून करतो ही गोष्ट मला
खूप महत्वाची वाटते, अशा वेळी दगडफेक, जाळपोळ करणे व धुम्रपान करून निषेध व्यक्त
करणे मला सारखेच वाटते. त्या कृतीचे परिणाम सकारात्मक असावेत असं मला वाटत.